كلمات بتزقّ عالي, قوي

فيض من غيض الجمال الذي تنوء به الكلمات التي تعتلي احساس الرائع محمد خير في ديوانه الجديد , قيد النشر بارانويا

مدينة لك يا رفيق, بما لا تعرفه , واتمنى ان يأتي ربيع اللقى لينع الحكي بيننا عنه, وأشياء كثيرة بعد

وعلى فكرة: شكراً ع الاهداء, بإعتباري من اللي لسه قادرين يتحملو, يعني شوية, على قد ما اقدر

وبخصوص الديوان الماضي, وكل وقت: رنا مش اغنية نازلة من السما لقلبك بس, مع انك قمر قلبها

رنا اغنية قلوب كتير, حاجة زي ميراث انساني حي لكل اللي يحبها

وهي ذاتها اكبر من قلب, وأكثر من مجرة بعتاد كامل من النجوم

****

وإليكم: المرجيحة

متأسف
مع إني عارف
انك لسة متعلمتيش تزعلي من حد

كنتي صغيّرة خالص
لما كنت بازقّك بالمرجيحة الطالعة النازلة

وفجأة سبتك
وسبت الجنينة كلها
وكبرت

دلوقتي لمّا بافتكرك
في جنتك اللعبة
بتراقبي العصافير
فاكراها بتتمرجح ويّاكي
وابصّ لنفسي
مابلاقيش بينّا أي فروق
غير يمكن حبّة أحزان
اتشعبطوا فيّا كأنهم أولادي

بصراحة أنا بتلكّك

وانت اللي جيتيلي برجليكي امبارح في الحلم
والصبح لقيت نفسي هنا

انا عارف
انك لسة مابتعرفيش تستهجّي الحروف

وان باب الجنينة أكيد صدّا
بعد عشرين سنة من الأكسدة المتواصلة

وعشان كدة مش ح اتخطّى حدودي



انا واقف برة أهو

ومش طالب منك غير ضحكة واحدة

بس تكون بأعلى صوت عندك

يعني ممكن تضحكيها
لحظة طلوع المرجيحة زي عوايدك

ضحكة واحدة بس

عشان اتأكد

إنك لسة موجودة