مع انو ما في حكي

سلام قبل الحكي

مش تنفيذ الاغنية ككليب , وهو بالحقيقة اي تنفيذ مش ممكن ينصفها , هو اللي مخليني احطها هون

بس الاغنية نفسها, اللحن و الكلمات و الاداء العادي جداً. وتحديداً لأنو عادي جداً و زي حكي القلب اللي ما بينقال, لامبالاة او مكابرة سخيفة مرات, بتاخدني بحالة بحس حالي فيها كتير حقيقية والبكى بيطلعلي ع اسمها.

هي سلام حقيقي لروحي لأنو بتطهرها من كل اغلفة التعايش و النسيان المصطنع و بتفلت بالقلب و بالعيون دموع حقيقية تماما

دايما بس اسمعها بفكر انو هي لكل شي حلو مهم و غايب عني بهالحياة , قسراً او بإرادتي:

التفاصيل المجنونة اللي ما في شفا منها.

حيفا اللي ع قد ما هي قريبة ع قد ما بيني وبينها "ناس و دول" وخيالات.

حبيبي اللي ما بعرف لو بلحظة حبني, وما بعرف لو بعطيه عمري اذا بيرضى يقلي مرة وحدة حقيقة الاشيا وليش وقف بيننا الحكي وامتلى قلبي الوجع

وجه امي بس تفيق الصبح راضية, وتبلش تعمل قهوتها ع رواق و تحلي الدنيا و اغاني فيروز بصوتها.

مدينتي اللي عم تتغسل بدموع خريف بيفل ع بكير, وبيترك بحرها و سماها لشتا الحنين و الذكريات اللي كلما بتبعد.

الاصحاب اللي بيني و بينهم حدود و دول ومواجع ما في طاقة غير للمولودين بقدر فلسطيني بإمتياز انو يتحملوها

رانيا , اول وحدة سمعت معها هالسلام اللي بيغني عن كل حكي

ورشا , بكرية , ميسون , ميسا , عريب ومنى , مهند و ابراهيم ويحي و علاء

هالغنية الكم انتو يللي معرفتكم فيها كتير سلام لروحي الخوتة

::

وبعد الحكي

و مع انو ما في حكي, في هون تحية لعود ما بيعزفني