رجعت الشتوية

عم تفتكر فيي؟
بهاللحظة, زي لحظات كتير انت مش موجود فيها, بتكون موجود بطريقتي الخاصة بإستحضارك من ضباب ذاكرة مجنونة بالفوضات
من لما فقت اليوم الصبح و بست ناي و هي نايمة,وأنا عم بفكر فيك
فكرت كم مرة انت بستني و انا نايمة و تركتني نايمة و رحت؟
ويا ترى بوستي هالقد بتكون حلوة و رايقة و بتعدل المزاج و بتخلي يومك حلو لما بتبوسني و انا نايمة؟
:
بالطريق ع شغلي, كانت الغيوم مملية الدنيا و ريحة الشتى مملية روحي
فيروز كان صوتها خفيف و زي المبحوح و هي عم تغني للجبل البعيد , وانا عم بتطلع ع كم جبل و جبل فيه بعيد قبل ما انت تكون موجود فعلاً
كانت فيروز عم بتغني كأنها مستحية و صوتها جايي من شي محل بعيد , يمكن بس أقرب شوي من الجبل اللي انت وراه
لما بلش الشتى, وقلبي كان عم بيشتي لهفة لأشوف وجك عم تضحك, أنا ضحكت
قلبي من جوا ضحك: لابسة صندل مفتوح مكشوف عن اصابعي وعن عري بيبدا من عروق رجلي و ما بيمتد لأعلى من ركبتي
ضحكت لأنو مع حضور فكرة انك موجود رغم كل البعد, بيكون العري الجسدي شي غبي تماماً
بهيك لحظة: روحي حقيقة عارية من كل الاقنعة, وبعرف تماماً انك عارف و انك حاسس من مطرح ما انت اني سعيدة بأنو أنكشف و أتكشف, بكل رغبة الصبية اللي فيي, ع الاخير لروحك
:
وصلت ع المفرق اللي بيودي الشغل: الارض مرطبة بخيراول شتوة بالسنة, ووحل الخطوات المستعجلة لتخبي الاجسام اللي حاملتها من هالبلل اللذيذ وريحة التراب تحت المطرة عم تجتاح كل خلية في, زي ما أنت بتعمل بالزبط
كل الناس مستعجلة تهرب من الشتوة المفاجئة, وأنا لحالي ماشية ع مهلي, لميت ياسمينة من البركة اللي عم تتجمع ع الارض و شميتها بفرح
جواي كملت فيروز تغني للشتوية اللي هواها_زي هواك_غلاب
:
فتت ع مطرحي بالشغل , وكملت ادندن مع فيروزنا, هالمرة بصوت قوي: لا بعيد و لا مستحي, يمكن شوي بعدو مبحوح من الرشح اللي معلق ع حبال صوتي زي ما بتعلق بحكيك: تعلق حلو لأنو مش واضح, بس بتعرف انو موجود
حطيت الياسمينة ع الطاولة و بلشت اشتغل و كل شوي اتطلع فيها و افكر
لو بتقدر ياسمينة زي قلوبنا _بيضا وطيبة و بريئة_ تقطع جبل ورا جبل ورا جبل و تروح لعندك ع البعيد اللي انت فيه
ولو بتقدر_بما انها وصلت ووصلت_ تتركلك ع شباكك الصباحي اللي بتطل منو ع الدنيا بوسة صغيرة مني: حلوة و رايقة و بتعدل المزاج و بتخلي يومك أحلى
:

هناك تعليقان (2):

Pianist يقول...

هو كلامك فكرني اكتر باغنية ع موقف دارينا مش عارف كنت حاسس اني باسمعها ف ودني طول مانا بقرا مش رجعت الشتوية
ليه ماعرفش

ملاك يقول...

المهم انك سمعت فيروز:)

يعني وصلك إحساسي بالشتوية عن طريق صوتها؟

شو بدي أحسن من هيك: اني اكتب شي يخلي حدا بهالعالم, حدا ما بعرفه بشي مطرح بهالعالم, يتطلع بالشي اللي كاتبة عنو من زاويتي بس باحساسو الخاص و بالموسيقى الداخلية تبعته




و: ع الموقف ركاب و ليل وبنية مهيوبة