طرب

كنت قد كتبت عن قضية السيد فخري كريم ضد الدكتور سماح ادريس ولكن الجهاز اللعين طير كل ما كتبت,فملعون تاريخ اول واحد اخترع ترانستور ويلعن شرف كل من مشي وراه بالتكنولوجيا وصولا لبيل غيتس لكل واحد قال ميكروسوفت (بالاذن من الغالي يحيى لاني بالمسبات اعلاه اقتبس تطعيمة من نهفاته اللذيذة ). ما علينا: برغم الحدث الجلل المذكور في بداية هذا البوست اللي مش معروف ليش هوي هون اصلاً, ولكن انا اعصابي رايقة جداً هاليومين وخايفة اتحول لنسخة فامينست من غاندي _ربنا يبشبش الطوب اللي تحت رماده المشحر اللي فوق ما قتلوه يا وردي حرقوه كمان_ وبالتالي لم ازل تحت التأثير السحري لما بثته قناة روتانا طرب (مشكور رب المال السعودي مرات لأنو بيطلع معهم اشيا روتانا ارفع لهم القبعة عليها) حيث اني و بعد ما فقت من نوم بعد الضهر الجميل و القليل اللي عم بيصحلي مؤخراً, طُربت لسماع العندليب الحزين برائعة"مداح القمر" وقلت وراه مليار "آمييييييييييييييييييييييييييييين" ع اللي صُبر و نال بحسب ما قالوا في الموال

ولم تكتفِ قناة روتانا طرب_يسعد رب المال السعودي مجدداً بهالجزئية اللي اسعدت يومي_بعُبد الجميل, بل اتحفتني وراءه مباشرة بعزف مجلجل للمبدع جهاد عقل على الكمان لأجمل الموسيقى في "ليالي الانس في فيينا" و من ثم موسيقى احد اغنياتي المفضلة من زمان"يا مسافر وحدك" وربنا يذكر بالخير الصبايا ببيروت و سهر بيروت ع انغام هالغنية

وبما انو مزاجي رايق ومطروبة , نبشت ذاكرتي و انا عم بقرأ رواية جميلة للطيب صالح بعنوان "عرس الزين" عن اغنايتي المفضلة اللي بجد بتخليني اتمايل طرباً, فطلع معي كتير من روائع الاصوات و الموسيقى العربية , بس اللي من لما تذكرتها معلقة ببالي _من شي 3 ساعات مثلا هالحكي؟ايه, هيك شي_ لهاللحظة هي رائعة الشيخ امام "انا اتوب عن حبك" وبالتحديد الجملة _الصلاة: ان كان امل العشاق القرب , انا املي في حبك هو الحب

لكل من يعرف الاغنية, هذه تحية لروح الشيخ الضرير, ودقة على باب ذاكرة اتمناها جميلة عند هالمسى, ولمن لا يعرفها: للاسف لم اجد لها رابطاً على النت, وبتمنى تلاقوها و تتمايلو طرباً برضو عليها

ومساكم طرب




ملحوظة هامة: ولا إشي, بس انا طماعة و املي بالحب هو الحب اولاً و القرب ما بيشكي من شي, دافي و حميم و حلاوته بتسكر و مش معنية اتهبلن و احرم حالي هيك اشي حلو بهالحياة بس لمجرد انو في عشاق مخابيل وبيرضو بالحد الادنى من حقوق قلوبهم عليهم :)))

هناك 4 تعليقات:

عبدالله النديم يقول...

حمد لله على السلامة وكتابتك تانى وربنا يديم الحالة الجيملة عليك
انا اتوب عن حبك انا أول أغانى الشيخ موجودة هنا اذا انت عايزاها
http://www.sawari.com/torath/z9mp3-5/ana-atoob-sawari.mp3
عرس الزين رائعة اسوأ مافيها اللهجة السودانية
واذا كان أملك الحب بس فالحب موجود بس دورى بجد
على فكرة قريبا جدا ستصدر عد تنازلى فى نسخة الكترونية

الناطق بلسان الباب الاخر يقول...

يحيى بيعلمك هيك مسبات؟! عن ماكنش الامل تسبو على اله التكنلوجيا...

احنا حكينا مره عن المال الخليجي ولوين لازم يروح.. بس ازا هالمال السعودي اسعدك بغنيه فما في مانع وبخاصه انه الهمك بركه الكتابه واتحفتينا بهالبوست...
تحيه لشيخنا, بكرا الجمعه ولازم اسمعله شي حلقه ذكر

مودني

عـــــــــــــــروبة يقول...

بس حكي!!!!!!
قولتك بنقدر نعمل شي اكتر من الحكي!!

نظرة ومن ثم صمت ...!!!
حتى الحكي الاغلب لا يتقن تكتيكه وبيخافوا ان حكوا يصير شي !!!!!
طيب ايش ممكن يصير زيادة ع اللي صار !!!

هذا بس تعليق ع بس حكي

بس يمكن الحكي يطلع من كونه مجرد حكي لشي اكبر
مين عارف !!!!!!!!!
تحياتي لك\\

watan يقول...

خخخخخخ

لأ أخر روقان .. ديري بالك صايرة تهمة هالايام !

واذا كنتي سبيتي على الجهاز الملعون الي طير كل اشي ، انا لازم اسب على الكهربا وشركة الكهربا والبلدية وكل الي بيشتغلوا فيها ، بتقطع في الوقت المناسب دايما تاركة كل اشي وراها رماد (زي المشحر غاندي ع قولتك) .. ما علينا اتعلمت اشي مهم ... استخدمي حفظ المسودات التلقائي .. احسن ليطير كل اشي واقوم اطير الجهاز من قدامي كمان :D

برضو ما علينا .. بتعرفي شو اكثر اشي بروقني فيروووووووز .. وفنجان قهوة واضراب عن الاخبار لأنه رح ينزعلي مزاجي كله

بالنسبة للحب .. خليها على الله

صباحك طرب دايما ( بما اني قرأتها ع الصبح)