Rhetorical Question

بحبك؟
شو بحبك؟

اكتر من اي شي بحبك
بينك و بين حالك حتى ما تفكر اذا او شو بحبك
اسأل كيف ممكن اكون لولا بحبك؟
وشو كل الاشيا تافهة و غبية و بلا طعمة اذا مش معك و عنك و الك؟
وشو الحكي صغير وقليل و بيضلو بس حكي اذ مش معك وعنك و الك؟
وشو الدنيا اذا مش عشانك عم بتدور كرة ارضها و بتشرق شمس سماها؟

وشو كل شي الا لانو انت فيه ؟

شو بحبك!
شو بحبك !
شو بحبك !

وشو صعب اني ما اقدر اقول

ورح ابلع الحكي واغص بهالكلمة و ما اقول
يمكن لو قلتها كمان مرة تفل ولا بقى تسمع و يموت ع لساني وكمان بقلبي كل الحكي
بسكت كمان وكمان
وبقول خلي اللغة خرسا والقلب عم يبنطق بينو وبينو بحبه اللي ما بيخرس نبضه لحظة
بخرس انا حتى ما اموت
بخرس لأنو بحبك انت وما بدي اخسرك بعد
بخرس لتضل بحياتي واعرف بس انو بكرا ممكن طالما انت بتضحك
بسكت و ما بقول
بس قلبك اكيد بيقدر احسن مني يقلك
اذا عبالك تعرف
انت بس اسألو و هو رح يقلك: شو بتحبك

هناك 3 تعليقات:

نسيـــــــان يقول...

شو بتحبي؟
كل واحد يحب الي يحبو و الي ما بيحب حبيو يحاول يحب اي اشي بينحب
هو اخرو كلو حب بحب
..
شو يعني حب؟؟

غير معرف يقول...

ولك حبّك بُرص منك إلو

ملاك يقول...

نسيان: الحب هو كل ما لن نتمكن من قوله بكلمات

لا تفسيرات لغوية تليق به: هو ذلك الاحساس الذي يضئ العمر مرة واحدة و الى الابد
::

غير معرف: تحبك الحيايا :]