لوحدي

لوحدي
بستمتع بطقس خرافي قد ما حلو هالايام بدبي
طول عطلة العيد اللي هي 5 ايام طلعت من باب بيتي 3 مرات بس
باقي الوقت مقضيته بالبيت عم بستمتع بكسل هائل
ساعة بقرأ
ساعة بشرب مي
ساعة بحضر تلفزيون
ساعاااااااااات راحت بالمهمة الخنفشارية الازلية تبعت اكل الشوكولاته الموكلة لجنابي من قوى خفية عظمى, وطبعا انا سعيدة جدا بكوني الجندية المعلومة لهيك مهمة

وساعة بسمع موسيقى و ببحبش بالنت ع اغاني قديمة استعيد معها روايح زمن جميل اسمه مبارح
ساعة بنظف البيت وبضوي شموع و برشرش عطر
ساعة برقص وبرقص و برقص مع نفسي و لنفسي
ساعة بقلب خزانتي و بصير بقيس تياب مش حاططتها ع جلدي من كزا وقت
وبجرب ألون عيوني و ابتسامتي واخترع تعابير جديدة ع وجي, وكل مرة بنغرم بمرايتي من اول وجديد كأني اول مرة بشوفني

وبحضر بأفلام
يا سلام شو حضرت افلام
شو ما عندي دي في ديهات حطيتها وقلت لازم اخلصها و هات يا حضران: على مصري على انكليزي ع اسباني ع امريكي ع فلسطيني

وطبخت طبخ, وينك يا ماما تشوفي ما اطيب اكلي؟
واشتقت لناس, بكيت ع ناس و كتبت رسائل وما بعتتها لناس, وناس محيتهم من ذاكرة تلفوني وآمالي
وبكيت ع اشيا صار لازم ارفع حدادها مني بقى, ودفنتها بالذكرى: مقبرة الايام
وتكسلنت
وتهبلنت
وعملت كتير تلفونات و ضحكت ع كتير ذكريات

لوحدي: مبسوطة بأني ارجع اكتشف معنى انو كون مبسوطة بهيك وحدة

لوحدي: كل يوم بيوم, بطبخ يومي بمكونات سرية فائقة اللذة و بستمتع بطعمه عم بيمشي ع ايقاعي الخاص
مرات مرتب لدرجة الملل كأنو دقة القلب العادية, وبالاغلب مستعجل و مبهور و مفتون كأنه دقة قلبي انا العادية

لوحدي بغني مع منير لقلب فاضي, طيب و هادي
وبالليل قبل النوم بحط ايدي بجيوب لحنوجيه عزيز و معنى صلاح جاهين و احساس منير وبغرف طرب : وحدي لكن ونسان وماشي كده

وبغفى ناطرة بكرا اللي رح يمشي على ما بين كده و كده

هناك تعليقان (2):

غير معرف يقول...

من مره لمره كثير منعش انه الواحد يبقى لوحده
مدونه اكتشفتها جديد وعجبتني
تحياتي
الليدي طمطم

غير معرف يقول...

كيف بنحذف التعليق
بتركلك هالمهمة بعد اذنك بما انو اقتراحك
كوني بخير
برضو دارك راين