لسه جوه القلب أمل

للأسف , بس مش كتير شديد يعني_ انو هالمدونة ما اجى وقت تتخمر براسي و تستوي لتطلع ع خطوط الشبكة العنكبوتية الا بوقت الحرب و ما بعد بعد الحرب

وهوي من خلقة ربنا ( سبحانو يعني) اني مش صحبة و لا شوي مع التكنولوجيا
يعني من الاخير يا دوب بعرف اطبع و ابعت ايميل و هيك اشيا سكر خفيف

يعني صح انو الدنيا بعدها "ما بعد الحرب" عنا بهالنواحي, وصح اني شبه مشردة و اهلي بيشوفوني اقل مما بيشوفوني الناس ع الشريط الحدودي_ والخنازير الصهاينة بمواقع المراقبة بلكي_ بس يعني حتى لو مش هيك الوضع و الانترنت تحت ايدي ليل نهار, ما بيكون في كتير فرق بشكل المدونة و لا رح تكون مزوزءة ( كيف مزوزءة هدي؟ طلعت كتير لبنيية) يعني بدها القصة صبر مني _ ومن اللي ممكن يشوفو بالصدفة هالحكي_ لحتى اصير افهم بقصص الصور و الاغاني

طيب ليش كل هالمقدمة؟
ببساطة, مش لاني بعتذر مثلاً عن انو عنوان هالتدوينة هو من اغنية "البحر بيضحك ليه" بصوت الشيخ امام و كلمات نجيب سرور, بس النهفة انو ما في اغنية بالتدوينة و لا حتى قريباً رح يكون في اغنية بكل هالمدونة ( لاني ببساطة بطيئة بالتعلم بما يخص التكونولوجيا و لاني مش ببساطة عم بكون مشغولة لدرجة انو ممكن ما ارجع اكتب الا لاوقع ع انترنت و هالشي مستبعد الا لما بجي ع بيتي)

القصة وما فيها, انو مجرد وجود هالمدونة هوي تأكيد انو بعد في أمل, بالقلب او بالكبد او وين ما كان

بس الامل موجود, بدليل انو جنابي _شخصياً يعني, شوفولكم هالشغلة شو كبيرة_ بهاللحظات عم بطبع هالاحرف اللي رح تكون تحت نظر اي قارئ للمدونة , عمداً او بالغلط او صدفة. "واحياناً الصدفة بتكون اكثر فتكاً من كل القصف"ع قولة شخص الو عندي كل الود

يعني بحكم صدف فتاكة, جنابي هنا الان ( مش عنوان رواية عبد الرحمن منيف اللي ما بقدر اقرألو لأني مخبولة يمكن او يمكن لأنو اسلوبو جاف و معقد ) ايه , كنت بدي اقول انو وجودي هون ع كرستي اللي بتوجعلي ضهري من طول القعدة عليها قبالة جهاز الكمبيوتر اللي تحول مؤخراً ل"جسم غريب" بالنسبة الي بعد طول الانقطاع عن اي شكل من اشكال الحضارة( اللهم ما عدا حضارة الدمار اللي تسبب فيها الجيش الاكثر اخلاقية في العالم بجنوب لبنان الواقع شمال فلسطين المحتلة) وجودي هوي بحد ذاتو دليل امل عظيم

ورغبتي انو ارجع اجي عشان اكتب بهالمدونة هي كمان انجاز للامل العنيد, عنيد بدليل انو بيضل يشحننا لنعمل اشيا بعد رغم اننا منكون بلحظات كتير بعاد عن مجرد احتمال الحياة للحظة الجايي

طيب شو لازمة كل هالحكي؟
زي ما قلت: هيدا "بس حكي" وبما انو هيك وبس, فالموضوع مش متحمل فذلكات كتير

صح هي خبرية التدوين كلها مفذلكة شوي بالنسبة الي, بس يعني بهاللحظة مش مهتمة كتير بالتنظير للاشيا و قيميتها
هلق مضغوطة كتير و مش عايدة اتحمل من اللي صارلي من 12 تموز عم بشوفو

بدي احكي
ويمكن كل الحكي يطلع فراطة ع قولة الرجوب _طز ع راسو و راس اللي زيو بلبنان و فلسطين و كل دحشة او حزق بهالكوكب

بس يعني انا بدي احكي
وفيكم" انتو قراء العمد او الغلط او الصدفة اللي ما بتموت ولا بتشق الجسم مليون شقفة, بس بتوجع كتير جوه بالروح, فيكم تسبوا لجنابي او تقولو "حرام" او ببساطة تفرقوني بريحة طيبة و تتركوني "أقر" هون لحالي

شو كمان؟

زهقت اليوم
بطلت تعودة انو اقدر انام ع سريري و لا بوجود مكيف و كهربا
يعني مبارح عم بسوق بصور راجعة ع البيت, بس عنا الشوارع مضواية!!!
استغربت
صارلي فترة مهمة بسوق او حدا بيسوق فيي ع الطفيش
سواقة بتعتمد ع نوع من الاستدلال من الذاكرة و الحدس اضافة لاضاءة السيارة اللي كتير مرات بتكون عامل نرفزة و انت بتسوق بطرقات عارف انو الصهاينة يمكن كاشفينك عليها, اكتر مما بتكون اضاءة مساعدة

كل الحضارة بزمن صور مثلاً صارت غريبة عني
ما بعرف كيف بدي استعيد القدرة ع التفكير بحياة مختلفة عن النمط اللي فرضته علي الحرب واللي اخترت اكمل فيه ما بعدها
اليوم صحيت 8 و نص, وهالشي بيعتبر رفاهية عالية المستوى للي متعودة تفيق مع صياح الديك
ما في توزيع مهام ولا انطلاق ع شي قرية او تحضير مواد او اي نوع من الشغل
في بس اني بقدر اعمل شو ما بدي

مبارح كنت مفكرة انو لما يصير عندي خيار انو اعمل شو ما بدي, مش رح الحق اشيا ببالي اعملها
كنت بدي اقص شعري واسبح و يمكن اروح شي محل اسهر ويمكن تتطور القصة معي و ابلش ارقص واحكي شي سبعين ساعة مع ماما و اصحابي من خارج دائرة الحرب و ما بعدها
بس اللي انا شخصياً مفاجئني كتير هوي انو كل اللي بدي اياه هوي انو اقعد اكتب عن الحرب و اللي عم بشوفو

يمكن لانو عنجد صرت زي الناس اللي عم بشوفهم كل الوقت: بحاجة للحكي

والحكي علاج بحد ذاته, بس من شو انا بدي اتعالج؟
شو بيعرفني, معي بعد كل الباقي من عمري لاعرف من شو بدي اتعالج
بس القصة هلق انو حسيت بدي احكي
مش لاتفذلك و انو يا عالم اشهد علينا و غزة و ع كل فلسطين و لا انو بدي اسجل بهاللحظة تحديداً اي نوع من التوثيق للي عم بعايشه يوميا

بدي احكي و بدي اقول لحالي _ قبل ما اكون عم بقول لاي حدا _اني بخير و انو رغم كل اللي صار بعد في بقلبي امل وبعد في جواي , هيك جوه جوه شي اخضر لا قدرت عليه الحرب و لا ما بعدها ورح يضل اخضر

يمكن بفعل صدفة افتك من كل القصف لأنو ببساطة هالشي لسه قادر يحس بود و بغضب و بسيل من مشاعر متناقضة بس حقيقية كتير و صادقة كتير
يعني لسه في انسان, والاحلى بكل الخبرية انو في متلي متايل

وهيدي مش صدفة : هيدي قدر

ليست هناك تعليقات: